A passione di a lingua nustrale
Dapoi dec’anni, Antone Tramini mette u so militantisimu linguisticu à u serviziu di i sculari. Ùn si conta più l’ore passate nantu à e strade di u circondu Aghjaccinu è dinò quelle à circà di trasmette a lingua corsa à i zitelli di e scole materne è primarie...
Antone Tramini hà fattu a so strada ind’u mezu culturale. Da "E voce di a Gravona", u so primu gruppu a u principiu di l’ottanta, sin’à d’avale incù "Mimoria tramandata", l’omu hà fattu e so prove. Dapoi deci anni, s’hè dinò messu à tramandà a lingua nustrale per via di a so attività d’intervenente. "Hè un mistieru assai difficiule ma ci tocca à lagà qualcosa à e generazione chì ghjughjenu. Stu filu ch’elli ci anu datu i nostri antichi." Antone hà principiatu di ghjennaghju u 2002, dopu avè passatu un’abilitzione. "Ci era un’annunzia nantu à RCFM, l’ispizzione circava ghjente per u sviluppu di a lingua corsa. Ci sò andatu è aghju passutu un picculu cuncorsu in Corti. Erami una vintena."
Primi passi ind’u 2002
Tandu, eranu i primi passi di a lingua corsa. Cunnisciutu per avè participatu, dapoi l’anni novanta, à parechji prughjetti pedagogichi incù sculari (intornu à a musica è u cantu corsu), Antone Tramini era dighjà à capu d’u travagliu incù i sculari. "Possu dì quantuque, ch’i primi tempi eranu abbastanza difficiuli. Parlà u Corsu, hè un fattu, u tramandà à zitelli da 3 à 10 anni, ghjè altre affare ! Ci hè bisognu di pedagogia è d’un quadru precisu di travagliu. In più, eramu, tandu, à u principiu, i zitelli facianu micca a sfarenza trà a recreazione è l’insignamentu di u Corsu..." Ellu metterà dui anni è mezu per avè una certa sperienza (nantu à u tarrenu) di stu travagliu d’intervenente. "Aghju fighjulatu i maestri travaglià, dumandatu cunsiglii per avanzà." Di nuvembre u 2007, Antone Tramini hè statu titularizatu in CDI. Hè statu un cambiamentu maiò ind’a me vita, masimu à u nivellu suciale. Ùn hè una paga tremenda chì ti permette di campà, ma t’assicura quantunque qualcosa. Eppò, quandu t’arrizi a mane per fà un mistieru chì ti piace, chè tù faci un attu militante, ci hè a mutivazione."
"Ci hè sempre a passione"
Per ciò chì tocca à i cuntinuti di e sequenze, ellu s’arrimba nantu à libri di u CRDP, stazii di l’ispezzione, senza sminticà a so sperienza. "Aghju un schedariu pedagogicu per ogni nivellu. Tuttu u me travagliu hè fattu intorn’à e strutture (secondu u nivellu). Tandu, approntu e sequenze i stu senzu quì." Antone Tramini travaglia à partesi di parechji temi : e stagione, a rientrata, i mesi, i ghjorni, natale, u carnavale è tant’altri. "U scopu hè di fà ch’u zitellu sia, ogni volta, attore è mai spetattore di ciò chì si passa." Filatrocche, puesie, è, di tandu in tandu una canzona sò dinò aghjustate. L’avvene ? "Ùn si sà per dumane è ghjè vera chì sta situazione ùn hè micca faciule per tutti l’intervenente. I respunsevuli si piattanu daretu à i cifri ma tuttu mondu a sà chè nantu à u tarrenu, i resultati ùn sò più li stessi. I bisogni, ci sò sempre è dinò u stintu. A lingua, ùn si spinghjerà..." Da Bastelica à Cavru, passendu per Uccià, Castelucciu o Peri, i zitelli di u circondu d’Aghjacciu, sanu, elli, tuttu ciò ch’ellu li trasmette dapoi deci anni stu Cutulese passiunatu è militante...
F.P.